२३ मंसिर, हुम्ला । सर्केगाड गाउँपालिका १ जैरकी मन्दिरा बुढा गर्भवती भएपछि नियमित स्वास्थ्य संस्थामा पुगेर परीक्षण गराइन् । उनले बर्थिङ सेन्टरमा बच्चा जन्माइन् । घर फर्किने बेला स्वास्थ्यकर्मीले भने,‘अहिले पैसा छैन् उधारो भयो पछि लग्नुहोला ।’
जेठमा बच्चा जन्माएकि मन्दिरा मंसिरसम्म पटक पटक बर्थिङ सेन्टर गइन् । सुत्केरी भत्ता लिन ‘उधारो नै छ । जहिल्यै पछि लिन आउनुहोला भन्छन्,’ उनले भनिन् ।
बर्थिङ सेन्टरमा बच्चा जन्माउँदा सुत्केरी आमालाई एक हजार पाँचसय सुत्केरी भत्ता दिने व्यवस्था छ । तर, यहाँका सुत्केरी आमाहरुले भने जेठयता सुत्केरी भत्ता पाउन सकेका छैनन् । बजेट नपुग्दा सुत्केरी भत्ता वितरण गर्न नसकेको सर्केगाड गाउँपालिकाका स्वास्थ्य संयोजक सन्तोष धामीले बताए । आजको नयाँपत्रिका दैनिकबाट
वि.सं.२०७५ मंसिर २३ आइतवार ०८:०९ मा प्रकाशित