४ कार्तिक । रौतहट जिल्ला साविक हथियाही गाविसका कार्यालय सहायक एवं हाल कटहरिया नगरपालिका वडा नं ८ का वडा सचिव कदिरवावु देवान उपर विशेष अदालत काठमाडौंमा आरोपपत्र दायर गरिएको छ ।
उनीमाथि रौतहट जिल्लाको विभिन्न गाविसहरूमा अर्धसरकारी अनुदान रकम तथा सामाजिक सुरक्षा भत्ता, स्थानीय पूर्वाधार विकास निर्माणको रकम दुरुपयोग भई भ्रष्टाचार र अनियमितता भएको भन्दै सम्बन्धित पदाधिकारी एवं कर्मचारीउपर आवश्यक छानविन गरी कानुनी कारबाही गरिपाउँ भन्ने व्यहोराको उजुरी परेको थियो ।
साविक हथियाही गाविसको चालु तथा पुँजीगत खर्च जथाभावि खर्च लेखी, भ्रमण खर्च, पेश्की लिई फछर्यौट नगरी, सामाजिक सुरक्षा भत्ताको रकम आफैंले बुझिलिएको आरोप सचिव देवानमाथि छ ।
उनले १२,५६,२७५।–अक्षरूपी बाह्र लाख छपन्न हजार दुई सय पचहत्तर रूपैंया बराबरको सार्वजनिक सम्पत्तीको हिनामिना, हानि नोक्सानी दुरुपयोग गरेको देखिएकोले निजले भ्रष्टाचार निवारण ऐन, २०५९ को दफा १७ बमोजिमको कसुर अपराध गरेको पुष्टि हुन आएको आयोगले बताएको छ ।
निज प्रतिवादी देवानलाई विगो रू. १२,५६,२७५।–(अक्षरूपी बाह्र लाख छपन्न हजार दुई सय पचहत्तर रूपैंया) कायम गरी भ्रष्टाचार निवारण ऐन, २०५९ को दफा १७ मा उल्लेख भएबमोजिम निज प्रतिवादीबाट असुलउपर गर्न माग दाब गर्दै आरोपपत्र दायर गरिएको आयोगले जनाएको छ ।
वि.सं.२०७६ कात्तिक ४ सोमवार १९:०८ मा प्रकाशित