१९ कात्तिक, काठमाडौँ । निवर्तमान सभामुख कृष्णबहादुर महरालाई डिल्लीबजारस्थित सदर खोरमा राखिएको छ । उनलाई कागाराको ‘क’ ब्लकमा राखिएको छ । ‘क’ ब्लकमा पूर्व आइजिपी रमेशचन्द ठकुरी र पूर्वडिआईजी रञ्जन कोइराला महराका ‘रुममेट’ रहेका छन् । ठकुरी र कोइराला बस्दै आएको कोठामा महरालाई राखिएको छ ।
ठकुरी सुडान शान्ति मिसनका लागि खरिद गरिएको सामान खरिदमा अनियमितता गरेको आरोपमा गत असारबाटै जेलमा रहेका छन् । उनलाई सर्वोच्च अदालतले १ वर्ष कैद र ४० हजार रुपैयाँ जरिवाना सजायको फैसला गरेको थियो ।
शसस्त्र प्रहरीका पूर्वडिआइजी रञ्जन कोइराला श्रीमती हत्या अभियोगमा जेल परेका हुन् । उनलाई सर्वस्वसहित जन्मकैदको सजाय सुनाइएको थियो ।
संसद सचिवालयकी एक कर्मचारीले आफूमाथि सभामुख महराले जर्बजस्ती गर्न खोजेको भन्दै मुद्धा हालेपछि असोज १९ गते महरालाई सभामुखको निवासबाटै पक्राउ गरिएको थियो । काठमाडौँ जिल्ला अदालतले सोमबार महरालाई पुर्पक्षका लागि जेल पठाउने आदेश दिएको थियो । अदालतले पुर्पक्षका लागि थुनामा पठाउने आदेश दिएपछि उनलाई सदरखोर लगिएको थियो । सदरखोर धेरै भिआईपीहरु अभियुक्तहरुले धेरै रोज्ने कारागार हो । अन्यत्रभन्दा आफन्तहरुसँग भेटघाट सहज हुने भएकाले पनि धेरैले डिल्लीबजार कारागार रोज्ने गरेका हुन् ।
समाचार स्रोत : नयाँ पत्रिका दैनिक
वि.सं.२०७६ कात्तिक १९ मंगलवार १२:०३ मा प्रकाशित