४ मङ्सिर, काठमाडौँ । यातायात व्यवस्था विभागले मोबाइल एप्लिकेसन प्रयोग गरी उपत्यकाभित्र भाडामा सञ्चालित निजी प्रयोगको सवारीसाधन मोटरसाइकल र स्कुटर माथि प्रतिबन्ध लगाउने घोषण गरेको छ ।
मङ्सिर ३ गते विभागले एक सूचना जारी गर्दै कानूनको उल्लंघन गरी निजी प्रयोजनमा दर्ता भएका सवारीले भाडामा यात्रु बोकेमा प्रचलित कानून बमोजिम कारवाही गर्ने जानकारी दिएको छ ।
उपत्यकाभित्र ‘टुटुल’ र ‘पठाओ’ एप्स प्रयोग गरी करिब १५ हजार मोटरसाइकल र स्कुटर भाडामा सञ्चालित छन् टुटलले यो सेवा दुई वर्षअघि देखि सञ्चालन गरिरहेको छ । यही सेवा सञ्चालनका लागि मात्रै टुटलले करोड रुपैयाँ भन्दा धेरै लगानी गरिसकेको छ । जावलाखेलमा कार्यालय रहेको टुटलमा मात्रै ३० भन्दा धेरैले प्रत्यक्ष रोजगार पाइरहेका छन् ।
यो एप्स प्रयोग गरी ६ हजार मोटरसाइकल र स्कुटर भाडामा प्रयोग भइरहेका छन् ‘पठाओ’ एप्सबाट भने यस्ता मोटरसाइकल सञ्चालन भएको ६ महिना मात्रै भएको छ । यही प्रयोजनका लागि यसले करिब २० लाख लगानीमा दरबारमार्गमा भव्य कार्यालय खोलेको छ भने टुटलका कार्यकारी अधिकृत शिक्षित भट्टका अनुसार टुटलसँग मात्रै करिब १० हजार ग्राहक आबद्ध छन् यसबाट दैनिक ३ हजारभन्दा धेरै यात्रुले प्रत्यक्ष सेवा लिइरहेका छन् ।
यस प्रयोजनमा मात्रै ९ हजार मोटरसाइकल र स्कुटर सञ्चालित भइरहेका छन् तर, प्रहरीले कानुन नभएको भन्दै पक्राउ गर्न थालेपछि व्यवसायी सहित यात्रुले पाउँदै आएको सेवा संकटमा परेको टुटलका कार्यकारी अधिकृत भट्टले बताए ।
यातायाता व्यवसायीहरु खुशी
सरकारले निजी प्रयोजनका लागि दर्ता भएका सवारीसाधनले पैसा लिएर यात्रु ओसारपसार गर्न रोक लगाउने निर्णय गरेपछि यातायात व्यवसायीहरु भने खुशी भएका छन् । यातायात राष्ट्रिय व्यवसायी महासंघका महासचिव सरोज सिटौलाले सरकारले बल्ल आएर सहि निर्णय गरेको प्रतिक्रिया दिएका छन् । यस अघि पनि महासंघले निजि प्रयोजनका लागि दर्ता भएका सवारी साधनलाई यात्रु बोक्न दिन नहुने बताउँदै आएको थियो । यो निर्णय सँगै यातायात व्यवसायीहरुको जित भएको जस्तो देखिएको छ । तर यातायात व्यवसायीहरुका कारणले यात्रुहरुले सास्ती पाउने निश्चित जस्तै देखिएको छ ।
वि.सं.२०७६ मंसिर ४ बुधवार १६:२० मा प्रकाशित