१० मंसिर, साइप्रस । गैरआवासीय नेपाली संघ (एनआरएनए) साइप्रसको पहलमा साइप्रसमा रहेका नेपाली महिलालाई समस्या पर्दा बस्ने घर (सेफ हाउस) को व्यवस्था गरिएको छ ।
एनआरएनएका निर्वतमान अध्यक्ष सुवास मल्लको पहलमा सुरु गर्न लागेको उक्त सेफ हाउसको हालै नवनिर्वाचित अध्यक्ष दिल कुमारी तिलिजा पुन (सुष्मा) को कार्यकालमा समुद्घाटन गर्न लागिएको एनआरएनए साइप्रसद्धारा जारी विज्ञप्तिमा जनाइएको छ ।
साइप्रसमा विभिन्न अवसरका लागि पुगेका नेपाली महिलाहरुको समस्यामा सहयोग गर्न सेफ हाउसको व्यवस्था गर्न लागिएको अध्यक्ष पुनले संसारन्युजलाई बताएकी छन् ।
पुनका अनुसार साइप्रसको निकोसियामा रहेको उक्त सेफ हाउसको डिसेम्बर १५ मा उद्घाटन तथा हस्तान्तरण गरिने छ । उनले यस पुनित कार्यका लागि साइप्रसमा रहनु भएका नेपाली दाजुभाइ दिदी बहिनी, सहयोगदाता, संघ संस्थाका प्रमुख तथा प्रतिनिधिको अनिवार्य तथा गरिमामय उपस्थितिको लागि अनुरोध समेत गरेकी छन् ।
झण्डै १५ जना बस्न मिल्ने उक्त सेफ हाउसको मासिक भाडा ५५० युरो रहेको र उक्त रकम मनकारी दाजुभाइ दिदीबहिनी तथा सहयोगीदातासंग अपिल गरिने पनि अध्यक्ष पुनले बताएकी छन् ।
वि.सं.२०७६ मंसिर १० मंगलवार १८:५९ मा प्रकाशित
