१५ मंसिर । कास्की जिल्लाको दुई नम्बर क्षेत्र प्रतिनिधिसभा सदस्यको उपनिर्वाचनमा सत्तारुढ नेपाल कम्युनिस्ट पार्टी (नेकपा) की उम्मेदवार विद्या भट्टराई फराकिलो मतान्तरका साथ विजयी भएकी छिन् ।
शनिबार भएको निर्वाचनमा उनले निकटम प्रतिद्वन्द्वी नेपाली काँग्रेसका खेमराज पौडेललाई ८४०९ मतान्तरले पछि पारेकी हुन् । उनले २४३९५ मत प्राप्त गर्दा नेपाली कांग्रेसका खेमराज पौडेलले १५ हजार ९८६ मत पाएका छन् । त्यस्तै, समाजवादी पार्टीका धर्मराज गुरुङले एक हजार ९२२, राप्रपाका रोम भण्डारीले एक हजार १५३ र साझा पार्टीकी रजनी केसीले ९९१ मत प्राप्त गरेको निर्वाचन अधिकृतको कार्यालयले जनाएको छ । यस क्षेत्रमा ७१ हजार ८७१ मतदाता रहेकामा ४५ हजार ५७९ जनाले मतदान गरेका थिए ।
२०७५ साल फागुन १५ गते यस क्षेत्रका सांसद् एवं तत्कालीन पर्यटन तथा नागरिक उडड्यनमन्त्री रवीन्द्र अधिकारीको हेलिकोप्टर दुर्घटनामा निधन भएपछि कास्कीको क्षेत्र नं २ मा प्रतिनिधिसभा सदस्यको उपनिर्वाचन भएको हो ।
निर्वाचित भट्टराई दिवङ्गत अधिकारीको धर्मपत्नी हुन् । भट्टराई विद्यार्थी कालमा राजनीतिमा सक्रिय भई अनेरास्ववियुको केन्द्रीय सचिव थिइन् । उनी शिक्षण पेशामा आबद्ध थिइन् ।
वि.सं.२०७६ मंसिर १५ आइतवार १९:१४ मा प्रकाशित