१९ मङ्सिर, पाल्पा । प्रदेश नं ५, भूमि व्यवस्था, कृषि तथा सहकारी मन्त्रालयले जैविक विविधताको संरक्षण, संवद्र्धन र दिगो उपयोग गरी कृषिको समुचित विकास गर्ने नीति लिएको छ ।
कृषि विकास निर्देशनालय रुपन्देहीद्वारा पाल्पाको तानसेनमा आयोजित कृषि जैविक विविधताको संरक्षणसम्बन्धी प्रदेशस्तरीय अन्तक्र्रिया कार्यक्रममा स्थानीय रैथाने अन्नबाली उत्पादनमा किसानको आकर्षण बढाउने र खाद्य तथा पोषण सुरक्षा सुदृढ गर्ने उद्देश्यले सो नीति लिएको मन्त्रालयले जनाएको छ ।
सो अवसरमा प्रदेश नं ५ भूमि व्यवस्था, कृषि तथा सहकारीमन्त्री आरती पौडेलले स्थानीय रैथाने बाली संरक्षणमा सबैको चासो हुनुपर्ने बताइन् ।
“हामी साना हुँदा गहुँभित्र बेथे हुन्थ्यो, अहिले हुँदैन । धानखेती गर्दा खेतमा माछा हुन्थ्यो, माछा माथ्र्यौँ, अहिले त्यस्तो स्थिति छैन”, उनले भनिन्, “रैथाने अन्नबालीको संरक्षण र उत्पादनमा सम्बन्धीत सबैको सक्रियता आवश्यक छ ।”
मन्त्रालयका सचिव तेजबहादुर सुवेदीले कृषि जैविक विविधताको संरक्षण, संवद्र्धन र दिगो उपयोग गर्ने नीति मन्त्रालयले लिएको बताउँदै कृषि जैविक विविधता संरक्षणसम्बन्धी कार्यक्रमलाई विशेष प्राथमिकता दिइने बताए ।
कृषिविज्ञ कमानसिंह थापाले देशमा आर्थिक परिर्वतनका लागि कृषिको दिगो विकास हुनु जरुरी छ भने ।
कार्यक्रममा खाद्य एवं कृषिजन्य आनुवंशिक स्रोत, पदार्थ तथा स्थानीय ज्ञान, सीप आदिको संरक्षण, उपयोग र लाभको समन्यायिक एवं न्यायिक अवस्था र वर्तमान र भावी पुस्ताको खाद्य सुरक्षा एवं गरीबी न्यूनीकरण गर्न कृषि जैविक विविधताको संरक्षणसम्बन्धी चार वटा छुटाछुटै कार्यपत्र प्रस्ततु भएको थियो । (रासस)
वि.सं.२०७६ मंसिर १९ बिहीवार १०:४५ मा प्रकाशित
