९ माघ, काठमाडौं । गण्डकी प्रदेशका प्रदेशसभा सांसद राजीव गुरुङ (दीपक मनाङ्गे)लाई पक्राउ गर्न प्रहरीले अनुमति पाएको छ । अखि नेपाल फुटबल संघ (एन्फा) कास्कीका अध्यक्ष मिलन गुरुङ्लाई दुर्व्यवहार गरेको आरोपमा उजुरी परेपछि मनाङ्गेलाई पक्राउ गर्न जिल्ला प्रशासन कार्यालय कास्कीले प्रहरीलाई बिहीबार अनुमति दिएको हो ।
सांसद मनाङ्गेले एक कार्यक्रममा झापड हानेपछि एन्फा अध्यक्ष गुरुङले जिल्ला प्रहरी कार्यालयमा उजुरी दर्ता गराएका थिए । पोखरामा जारी मुख्यमन्त्री कपको उद्घाटन कार्यक्रममै मनाङ्गेले एन्फा अध्यक्ष गुरुङलाई झापड हानेका थिए ।
मनाङ्गे बुधबार पत्रकार सम्मेलन गर्दै आफूमाथि ठगी गरेका कारण झापड हानेको बताएका थिए । उनले आफ्ना १८ जना खेलाडीलाई गुरुङले अलपत्र पारेको आरोप पनि लगाएका छन् । पत्रकार सम्मेलनमै मनाङ्गे ठगहरुलाई झाप्पड हान्दा रमाइलो लाग्ने प्रतिक्रिया दिएका थिए ।
वि.सं.२०७६ माघ ९ बिहीवार १६:२० मा प्रकाशित
