१२ माघ, काठमाण्डौं । गैरआवासीय नेपाली संघका अध्यक्ष कुमार पन्तले विशेष अधिबेशन मागको कुनै औचित्य नभएको र हास्यास्पद भएको बताएका छन् ।
संघको विश्व सम्मेलन सकिएको केहि महिनामै संघका पूर्वउपाध्यक्ष कुल आचार्य, सचिव जानकी गुरुङलगायतले संघको आर्थिक तथा सांगठनिक प्रतिवेदन पास नभएको भन्दै विशेष अधिबेशनको माग गरेका थिए ।
सोहि मागलाई लिएर संसारभरी यस विषयमा बिभिन्न कोणबाट टिप्पणी भइरहेका बेला पन्तले एक भिडियो मार्फत् विशेष अधिबेशन गर्ने निर्णय भइसकेको कुरालाई फेरि माग गर्नु औचित्यहिन र हास्यास्पद भएको बताएका हुन् ।
उनले विश्व सम्मेलन र अन्तराष्ट्रिय महाधिवेशनका क्रममा संघको सांगठानिक प्रतिवेदन र आर्थिक प्रतिवेदन पास हुन नसकेको स्वीकार्दै पोखरामा हालै सम्पन्न नयाँ कार्यसमितिको प्रत्यक्ष बैठकले विशेष अधिबेशन गर्ने निर्णय गरेको र त्यसको तयारी समेत भइरहेको बताएका छन् । उनले अधिबेशन कहाँ र कहिले गर्ने भन्ने बारेमा केहि दिनमै घोषणा गर्ने समेत बताएका छन् ।
‘केही साथीहरुले विशेष अधिबेशनको माग गरेको पाए । अन्तराष्ट्रिय समन्वय परिषद्को पहिलो बैठकले नै निर्णय गरिसकेको कुरालाई फेरि विशेष अधिबेशनको मागमा मैले कुनै औचित्यता देख्दिन । निर्णय गरिसकेको कुरा आफैमा हास्यास्पद छ ।’
अध्यक्ष पन्तले गैरआवासीय नेपाली संघको लामो अनुभवले निर्वाचनका पद्धतिहरु तथा सांगठनिक संरचनामा पनि केही फेरवदल गर्नुपर्ने महसुस गरेको बताउँदै यी कुराहरुलाई विशेष अधिबेशनमा पनि लिएर जाने समेत बताए ।
आर्थिक तथा सांगठनिक प्रतिवेदन लगायत निर्वाचन पद्धति, सांगठिनक संरचनाहरुमा गर्नुपर्ने केही फेरबदल इत्यादिका लागि विशेष महाधिबेशनमा सहभागी भएर छलफलमा सहभागी भएर सहयोग गरिदिन पनि अध्यक्ष पन्तले संसारभरीका गैरआवासीय नेपालीहरुलाई अनुरोध गरेका छन् ।
वि.सं.२०७६ माघ १२ आइतवार १७:४१ मा प्रकाशित