२१ माघ, काठमाडौं । नेपाल कम्युनिस्ट पार्टी (नेकपा)का अध्यक्ष पुष्प कमल दाहाल प्रचण्डलाई सामाजिक सञ्जालमा ‘रिप’ लेखेर विवादमा आएकी एसपी गंगा पन्तलाई अन्ततः पर्सा पुर्याईएको छ । यसअघि चितवनमा सरुवा गरिएकी उनलाई राजनीतिक दबाबका कारण चितवन जान नसकेपछि पर्सा सरुवा गरिएको हो ।
जिल्ला प्रहरी कार्यालय चितवनमा भने प्रहरी उपरीक्षक (एसपी) नातीराज गुरुङलाई पठाएको छ । प्रहरी प्रधान कार्यालयका प्रवक्ता शैलेश थापा क्षेत्रीले चितवनमा गुरुङलाई पठाइएको पुष्टि गरेका छन् ।
यसअघि चितवनका तत्कालीन एसपी दानबहादुर मल्लको विमानस्थल सुरक्षा प्रहरी कार्यालयमा सरुवा भएको थियो भने पन्तलाई चितवन पठाईएको थियो।
प्रचण्ड र नेपाली कांग्रेस सभापति शेरबहादुर देउवा सम्बन्धी स्टाटसमा पन्तले फेसबुक कमेन्टमा ‘रिप’ लेखेपछि उनको केही अघि आलोचना भएको थियो । त्यही विषयलाई लिएर पन्तलाई चितवनमा जानबाट रोक लगाइएको प्रहरी अधिकृतहरु बताउँछन् ।
पन्तलाई पर्साको जिम्मेवारी दिएपछि पर्सामा रहेका हालका एसपी सोमेन्द्रसिंह राठौरलाई काठमाडौं प्रहरी परिसर, टेकुमा ल्याइएको छ ।
वि.सं.२०७६ माघ २१ मंगलवार १७:११ मा प्रकाशित