२९ माघ, काठमाडौं । बुधबार बसेको प्रतिनिधि सभाको बैठकमा नेपाल मजदूर किसान पार्टीका सांसद प्रेम सुवालले कोरोना भाइरसको महामारीग्रस्त चीनबाट नेपालीहरुलाई स्वदेश नफर्काउन माग गरेका छन् । भक्तपुरको खरिपाटीमा क्वारेन्टाइन बनाउने सरकारले निर्णय गरेकाप्रति पनि उनले विरोध जनाए ।
सुवालले चीनबाट नेपालीहरुको उद्धार गर्न नहुने धारणा प्रनिनिधि सभामा निरन्तर राखिरहेका छन्। यसैक्रममा उनले बुधबार उद्धार गर्न नहुनेमात्रै होइन, उद्धार गरेर खरिपाटीमा राख्न सिफारिस गर्ने सचिवलाई समेत कारबाही गर्न माग गरे।
उनले भने, ‘खरिपाटीमा क्वारेन्टाइन बनाउने भनेर सरकारले निर्णय गरेको छ। तर, त्यसो गर्न मिल्दैन। यहाँ सिफारिस गर्ने सम्बन्धित मन्त्रालयका सचिवलाई निलम्बन गरी कारबाही गर्न माग गर्दछु।’
चीनमा रहेका कोरोना भाइरस प्रभावित नेपालीलाई उद्धार गर्न सरकारले आगामी शनिबार जहाज त्यसतर्फ पठाउने भएको छ । यहि फागुुन ३ गते नेपाल एयरलाइन्सको वाईड बडी चीनको वुहान जाने तय भएको हो । यसले कोरोनाका कारण वुहानमा फसेका १८० नेपाली विद्यार्थीको उद्धार गर्ने छ । वुहानमा रहेका विद्यार्थीका आफन्तले आफ्ना सन्तानलाई छिट्टै नेपाल ल्याउने वातावरण मिलाउन सरकारलाई निरन्तर दवाव दिँदै आएका थिए ।
वि.सं.२०७६ माघ २९ बुधवार १४:५८ मा प्रकाशित