५ फागुन, काठमाडौं । अमेरिकी परियोजना मिलेनियम च्यालेञ्ज कर्पोरेशन (एमसीसी)बारे अध्ययन गर्न गठित कार्यदले संझौतामा संसदमा प्रस्तुत भएका बाहेक अन्य दर्जनभन्दा बढी सम्झौता फेला परेको खुलासा गरेको छ । कार्यदलका एक सदस्य भीम रावलले अहिलेसम्म संसदमा प्रस्तुत भएको बाहेक दर्जन बढी सम्झौता फेला परेको र अझै अरू पनि हुन सक्ने बताए । संसदमा प्रस्तुत भएको बाहेक अन्य सम्झौताको विषयमा आचारसंहिताका कारण बोल्न नमिल्ने उनले जानकारी दिए ।
साथै नेता रावलले एमसीसीका विषयमा जथाभावी नबोल्न शीर्ष नेतालाई चेतावनी दिएका छन् । नेकपाको केन्द्रीय कार्यसमिति बैठकले गठन गरेको कार्यदलका सदस्य रावलले अध्ययन भइरहेको विषयमा जथाभावी नबोल्न नेताहरुलाई चेतावनी दिएका हुन् ।
केन्द्रीय समितिले दिएको अधिकार अनुसार आफूहरूले एमसीसी सम्झौता र योसँग जोडिएका विषयमा छलफल गरिरहेको भन्दै एमसीसीका सम्बन्धमा निर्णय सुनाउने अधिकार केन्द्रीय कमिटीले कसैलाई नदिएको उनले बताए।
सत्तारुढ नेपाल कम्युनिष्ट पार्टी (नेकपा)को केन्द्रीय कमिटी बैठकमा एमसीसीलाई लिएर विवाद उत्पन्न भएपछि पार्टीले अध्ययन कार्यदल बनाएको थियो । कार्यदलको समय विहिबार १० दिनका लागि थप गरिएको छ । पूर्व प्रधानमन्त्री झलनाथ खनालको संयोजक रहेको कार्यदलमा भीम रावल र प्रदीप ज्ञवाली सदस्य रहेका छन् ।
वि.सं.२०७६ फागुन ५ सोमवार १२:०१ मा प्रकाशित
