८ फागुन, काठमाडौँ । जलस्रोत तथा सिंचाई बिकास डिभिजन कार्यालय, पाटन, बैतडीका निमित्त कार्यालय प्रमुख इन्जिनियर सुरेश राज भट्ट दुई लाख घुस रकमसहित पक्राउ परेका छन् ।
इन्जिनियर भट्टले चमेलिया खोला तटबन्ध नियन्त्रण निर्माण योजनाको कामको सम्झौता गर्न आलटाल तथा ढिलासुस्ती गरी हाल उक्त सम्झौता गरिदिए बापत सेवाग्राहीसँग घुस मागेको सूचनाको आधारमा पक्राउ गरेको हो ।
अख्तियार दुरुपयोग अनुसन्धान आयोगको कार्यालय, कञ्चनपुरबाट खटिई गएको टोलीले इन्जिनियर भट्टलाई घुस बापतको रकम एक लाख रुपैयाँ लिइसकेको अबस्थामा र स्रोत नखुलेको रकम रु एक लाख गरी जम्मा दुई लाख रकमसहित उनकै कार्यालयस्थित निवासबाट नियन्त्रणमा लिई अनुसन्धान भइरहेको अख्तियारका प्रवक्ता प्रदीपकुमार कोइरालाद्वारा जारी विज्ञप्तीमा जनाइएको छ ।
वि.सं.२०७६ फागुन ८ बिहीवार ०९:१४ मा प्रकाशित