११ फागुन, काठमाडौं । नेपाल कम्युनिस्ट पार्टी (नेकपा) अध्यक्ष पुष्पकमल दाहाल ‘प्रचण्ड’ले प्रदेश २ मा सरकार परिवर्तन हुनसक्ने बताएका छन् । राष्ट्रिय जनता पार्टी (राजपा)सँग वार्ता भैरहेको र कुरा मिले लगत्तै प्रदेश २ मा सरकार परिवर्तन हुने उनले बताए ।
मिथिलाको महाकुम्भ मानिने १५ दिवसीय मिथिला मध्यमा परिक्रमाको आइतबार उद्घाटन समारोहमा पुगेका प्रचण्डले यस्तो संकेत गरेका हुन्। ‘राजपा नेपालसँग आन्तरिक गृहकार्य भइरहेकाले कुरा सम्पन्न भएलगत्तै प्रदेशमा सरकार फेरिन्छ’, प्रचण्डले भने। लामो धार्मिक यात्राको रुपमासमेत परिचित यस परिक्रमामा सहभागी हुने अवसर पाउँदा खुसी लागेको प्रचण्डले बताए।
मिथिला मध्यमा परिक्रमाको आरम्भमा ‘प्रचण्ड’ सहभागी भएका हुन्। रातो कुर्ता, पैजामा र रमरम्मा गम्छामा सजिएर परिक्रमा डोला उठाउन प्रचण्ड बिहानै मिथिला विहारी नगरपालिकाको कचुरी पुगेका थिए।
वि.सं.२०७६ फागुन ११ आइतवार १५:१८ मा प्रकाशित