Sansar News- Nepal's Fast Khabar Online News Portal

राजेन्द्र तारकिणीको सम्पत्ति विवरण

संसार न्यूज़
३ वर्ष पहिले
राजेन्द्र तारकिणीको सम्पत्ति विवरण

rajendra-tarikini

सरकार !
तिम्रो मण्डलका मन्त्रीहरूको झैँ
मणि–माणिक्य, हीरा, पन्ना र सुनचाँदी,
देश–विदेशमा घर/घडेरी र जमिन,
कार, बैंक ब्यालेन्स र शेयर नहोला मसँग
तर नठान्नू कि म कङ्गाल छु ।

सरकार !
मसँग पनि छ सम्पत्ति–
१२ ग्रामको एक थान मथिङ्गल,
जहाँ लाखौँ असल बोट फल्छन् विचारका
लहरा झाँगिन्छन् सुन्दर कल्पनाका ।
सुन्दर सपनाले गुँड लगाइरहने
चौँथाइ ओजका दुई थान आँखा छन्,
जो बन्न सकेका छैनन्
तिम्रा (मन्त्रीहरूका) चोर गतिविधि नियालिरहने सीसीटिभी
तर सम्यक मार्ग पहिल्याउन सक्षम छन् ।
एक औसत घ्राणशक्तिको नाक छ,
राज्यका सक्कली अभियुक्तहरू चिन्न समय लाग्ला
तर भ्रष्टाचार, दलाली र हिंसाको तिखो गन्धले रन्थनिएको छ ।

(सरकार, मसँग दुई थान कान पनि थियो
ठीक दश वर्षअघि (दशवर्षे जनयुद्धको मलामी–समय)
बारुदी धरापमा परेझैँ अचानक भग्न भए
तर नठान्नू कि म सुन्न सक्दिनँ तिम्रो झुटो बयान ।)

मेरो सम्पत्ति दुई थान मृगौला पनि हो,
जो आमाको जीवन बचाउन बेच्नुपर्नेछ मैले
मेरो अस्तित्वको ‘बीजभण्डार’ पनि छ
जो सृष्टिको नैरन्तर्यलाई दान गर्नुपर्नेछ मैले ।

मेरो सम्पत्ति दुई थान पाखुरी पनि हो,
जसले जीवनको बारी आबाद गरेर
दैनिक दुई माना चामल फलाउछ
प्रशोधनका लागि एक पाचनयन्त्र पनि छ ।
घडेरीका रूपमा दुई थान पाइताला छन्
जसमाथि यो एक मांशपिण्डको घर
अड्याएका छन् पातला नलिहाडका पिल्लरहरूले ।

अर्को एक थान सङ्गीत बाजा पनि छ– मुटु
कहिलेकाही नराम्रोसँग आघात पर्दा
धुक्क र धुक्क गर्दै पीडाको धुन निकाल्छ,
अक्सर त्यहाँ घुमिरहन्छ एक जैविक टर्बाइन्
र, बलिरहन्छ मेरो प्राणको बत्ती ।

सबैभन्दा मूल्यवान् सम्पत्ति–
मसँग इमान छ/स्वाभिमान छ,
र, छ ज्यानमा एक थान मानवताको खोल ।

तर सरकार !
मैले देशको ऋण पनि बोकेको छु ।

सरकार !
यो सम्पत्ति विवरण
सोह्रै आना सही हो (झुटो भए कानुनबमोजिम सहुँला/बेहोरुलाँ)
जुन आमाबाबाको रगत–पसिना–वीर्यले आर्जित
मेरो पुख्र्यौली सम्पत्ति हो ।

सर्बाधिक पढिएको

रविबाट पीडित भएका शम्भुले भने-‘म पनि आत्महत्या गर्न चाहान्थे’

रविबाट पीडित भएका शम्भुले भने-‘म पनि आत्महत्या गर्न चाहान्थे’ ३ महिना पहिले | संसार न्यूज़

५ भदौ, काठमाण्डौं । सर्लाहीका शम्भुकृष्ण शाह सर्लाही क्याम्पसमा पढाउने…

पत्रकार पुडासैनीको पोष्टमार्टम रिर्पोट आयो, यसबारे प्रहरीले खुलाएन, सिआइबीको टोली चितवनमा

पत्रकार पुडासैनीको पोष्टमार्टम रिर्पोट आयो, यसबारे प्रहरीले खुलाएन, सिआइबीको टोली चितवनमा ३ महिना पहिले | दीपेन्द्र अधिकारी चितवन

२ भदौ, चितवन। चितवनको नारायणगढस्थित बसपार्कमा रहेको कंगारु होटलमा आत्महत्या…

शिक्षक लाईसेन्स : आज नेपाली विषयको नमुना वस्तुगत प्रश्नोत्तर

शिक्षक लाईसेन्स : आज नेपाली विषयको नमुना वस्तुगत प्रश्नोत्तर ४ महिना पहिले | संसार न्यूज़

२४ असार, काठमाडौँ । शिक्षकको पेसागत विकासले गुणस्तरीय शिक्षा प्रदान…

पत्रकार किशोर भन्छन्–‘भिडियो परिवारले नै दिएको हो, रवि लामिछानेको निर्दोषिता प्रमाणित होस्’

पत्रकार किशोर भन्छन्–‘भिडियो परिवारले नै दिएको हो, रवि लामिछानेको निर्दोषिता प्रमाणित होस्’ ३ महिना पहिले | संसार न्यूज़

३२ साउन, काठमाण्डौं । पत्रकार किशोर श्रेष्ठले पत्रकार शालिकराम पुडासैनीले…