१.
यहाँ हरेक नाता सम्बन्ध, वारिपारी बनेको छ
आजकल त सबैको शत्रु, महामारी बनेको छ
सिंगो मानवलाई दैवले, विशाल चुनौती दियो,
आज बिश्वको लागी, कोरोना भारी बनेको छ ।
२.
उनि सँगै हुदा त, बैशालु मात बेग्लै थियो
दुनियाँ भुलाउने, मायालु हात बेग्लै थियो
आज पो शून्य लाग्छ, मलाई यो दिनपनि,
तिम्रै अँगालोमा रम्दा पो, रात बेग्लै थियो ।
३.
आखिर जिन्दगी पनि, हाँसो र रोदनको मेल रहेछ
कुन पल हारिन्छ पत्तै नहुने, अचम्मको खेल रहेछ
बेलैमा बुझ्न सकिएन, र त ठुलो गल्ती दोहोर्याईयो,
फसे उम्कन गाह्रो, यो पिरती नि बर्षाको भेल रहेछ ।
४.
हात जोडी बस जिन्दगी, भिख माग्ने दिन आयो
संसारिक मोह त्यागी, बनवास लाग्ने दिन आयो
यार सबैलाई याद छ, जगतकै कटु सत्य मृत्यु हो,
मुख्य कुरा बुझ्दानि, काल देखि भाग्ने दिन आयो ।
५.
उतैतिर नै पिरतीको, डोरी बाटेछौ मनको मान्छे
कहाँ को सँग रंगीन रात, काटेछौ मनको मान्छे
परिस्थिति जस्तो आएपनि, दूर त हुँदिन भन्थ्यौ,
कस्को कारण टाढा जान आटेछौ, मनको मान्छे ।
वि.सं.२०७६ चैत २४ सोमवार ११:२८ मा प्रकाशित