१४ बैशाख, काठमाण्डौं । गैरआवासीय नेपाली संघ (एनआरएनए) ले कोभिड–१९ तथा राहत तथा उद्धार अवधारणापत्र २०२० सरकारलाई बुझाएको छ ।
संघका उपाध्यक्ष तथा बैदेशिक रोजगार कार्यदलका संयोजक डा. बद्रि केसीको संयोजनमा तयार पारिएको Non-Resident Nepali Association (NRNA) COVID-19 Relief and Repatriation Program 2020 अवधारणापत्रलाई संघको कार्यकारी बैठकले पारित गरि नेपाल सरकारलाइ बुझाइएको हो ।
अबधारणा पत्रमा बिशेष गरि कोभिड १९ र यसबाट नेपालीहरु तथा विश्व समुदायमा परेको अप्ठेरो, तत्कालको लागि गर्नुपर्ने काम र नेपाल सरकारको सहयोगबारे उल्लेख गरिएको छ । कार्यक्रमको सञ्चालन र व्यवस्थापन संबन्धि कार्यविधि पनि पत्रमा उल्लेख गरिएको छ ।
खासगरी उद्धार, राहत र उपचारमा केहि सहयोग गर्ने कुरामा पत्र तयार गरिएको छ । यसका लागि संघले ५ करोडको सिडमनी राख्ने र नेपाल सरकारको बैदेशिक रोजगार कल्याणकारी कोष अथवा अन्य कोषबाट १५ करोड रुपैया गरि जम्मा २० करोड रुपैयाको कोष बनाउने प्रस्ताव गरिएको छ ।
पत्रमा उद्धार र राहत संघका राष्ट्रिय समन्वय परिषद, क्षेत्रीय तह, डायस्पोराका विभिन्न संघ-सँस्था र नेपाल सरकारका मिशन, राजदूतावास समेतको संयोजनमा काम गरिने कुरा प्रस्ताव गरिएको छ ।
राहत र उद्धार गर्नुपर्ने व्यक्ति र परिवारहरुको लागि अनलाइन डाटा कलेक्शन गर्ने, संघको हटलाइन फोन सेवाबाट सूचना लिने जस्ता विधिको समेत उल्लेख गरिएको छ । सो अबधारणा पत्र संघको वेबसाइटमा समेत अपलोड गरिने जानकारी संघका प्रवक्ता डिबी क्षेत्रीले दिएका छन् ।
वि.सं.२०७७ वैशाख १४ आइतवार १२:४९ मा प्रकाशित
