२ जेठ, सोलुखुम्बु । जातीय विभेद गरेको आरोपमा सोलुदूधकुण्ड नगरपालिका–११ तिङ्लाका ३१ वर्षीया सङ्गीता राई पक्राउ परेकी छन् ।
सोही ठाउँका २८ वर्षीय मीनबहादुर नेपालीले आफूमाथि जातीय विभेद भएको भन्दै प्रहरीमा उजुरी दिएपछि प्रहरीले उनलाई पक्राउ गरेको हो । बुधबार पक्राउ गरिएकी ती महिलामाथि आवश्यक अनुसन्धान अगाडि बढाएको जिल्ला प्रहरी कार्यालय सोलुखुम्बुका प्रहरी निरीक्षक महेन्द्र दर्नालले जानकारी दिए ।
तिङ्लाको भदौरेमा हिँड्दै गरेको अवस्थामा गत शनिबार आफूमाथि जातीय विभेद गरेको भन्दै मीनबहादुरले प्रहरीमा जाहेरी दिएका थिए । सोही जाहेरीका आधारमा सङ्गीतालाई पक्राउ गरिएको जिल्ला प्रहरी कार्यालय सोलुखुम्बुले जनाएको छ ।
‘सार्वजनिक बाटोमा मेरो अगाडि हिँड्छस, तँ दमाई, भनेर ढुङ्गाले हिर्काउँदै लखेटेको’ मीनबहादुरको जाहेरीमा उल्लेख छ । उनले नेपालको संविधान २०७३ को भाग ३ को धारा २४ मा छुवाछूत तथा भेदभावविरुद्धको हकबारे स्पष्ट उल्लेख गर्दै राईमाथि कार्वाहीको माग गरिएको छ ।
वि.सं.२०७७ जेठ २ शुक्रवार ११:३८ मा प्रकाशित