१ साउन, काठमाडौं । श्रोत नखुलेको झण्डै १ करोड रुपैयाँसहित दुई युवा पक्राउ परेका छन् ।
उनीहरुलाई रुपन्देहीको सिद्धार्थनगर नगरपालिका ६ बाट मंगलबार पक्राउ गरेको प्रहरीले जनाएको छ ।
सशस्त्र प्रहरी बल रुपन्देहीको टोली र राजस्व अनुसन्धान कार्यालयका कर्मचारीले श्रोत नखुलेको ९९ लाख २ हजार ५ सय रकमसहित सिद्धार्थनगर नगरपालिका २ का ३८ वर्षीय सुनिल सुनार र ३७ वर्षीय अमित परियारलाई पक्राउ गरेको हो ।
सुनारले चलाएको प्रदेश नं. ३ ०३-०१-०२३-च ३२०९ नम्बरको कारमा ७३ लाख ५५ हजार रुपैया फेला परेपछि रकम श्रोत नखुल्दा उनलाई पक्राउ गरिएको थियो ।
साथै उनको घरबाट १२ लाख ६६ हजार रुपैयाँ तथा उनको ज्वेलरी पसल सोनु ज्वेलर्सबाट पनि १२ लाख ८१ हजार ५ सय रुपैयाँ बरामद गरिएको सशस्त्र प्रहरीले जानकारी दिएको छ । अमित परियार सुनिल परियारको पसलमा कामदारका रुपमा कार्यरत रहेको बताइएको छ ।
उनीहरुलाई थप अनुसन्धानका लागि इलाका प्रहरी कार्यालय बुटवलमा बुझाइएको बताइएको छ ।
वि.सं.२०७७ साउन १ बिहीवार १२:२२ मा प्रकाशित