काठमाडौं । लोकसेवा आयोगले कोरोना महामारीबीच परीक्षा सम्बन्धी मापदण्ड–२०७७ लागू गरेर परीक्षा सञ्चालन गर्ने तयारी गरेको छ । परीक्षाहलमा परीक्षार्थीका लागि मास्क अनिवार्य रहेको मापदण्डमा तोकिएको छ । अनिवार्य मास्कका कारण परीक्षामा नक्कली परीक्षार्थी सहभागी हुनसक्ने जोखिम देखिएको छ ।
स्वास्थ्यसम्बन्धी मापदण्ड लागू गरेर कात्तिकदेखि परीक्षा सञ्चालन गर्न आयोगले स्थगित र नयाँ परीक्षाको कार्यतालिका सार्वजनिक गरेको छ । स्वास्थ्यसम्बन्धी मापदण्डले नै नक्कली परीक्षार्थी बढ्ने जोखिम बढाएको छ ।
मास्कका कारण परीक्षार्थीको अनुहार पहिचान गर्न गाह्रो हुँदा एउटाको परीक्षामा अर्को व्यक्ति सहभागी हुन सक्ने जोखिम छ । आयोग प्रवक्ता गीताकुमारी होमेगाईका अनुसार आयोगको बैठकमा समेत जोखिम बढ्न सक्नेबारे छलफल भएको थियो । मापदण्डमा जोखिम बारे केही उल्लेख नभएता पनि यससम्बन्धी आयोग सचेत रहेको प्रवक्ता होमेगाईको भनाई छ ।
आयोग प्रवक्ता गीताकुमारी होमेगाईंका अनुसार मास्क लगाएर एउटाको परीक्षा दिन अर्को आउने जोखिम हटाउन सुरुमा एकपटक मास्क खोल्न लगाएर क्रसचेक गरीने छ ।
आयोगले बनाएको मापदण्डमा एउटा कोठामा बढीमा २५ जनालाई सहभागी गराइनेछ । सिट प्लानिङ दुई मिटर कायम हुने गरी गरिने छ । परीक्षार्थीले स्यानिटाइजर र मास्क अनिवार्य रूपमा प्रयोग गर्नुपर्नेछ । हाजिरी गर्ने तथा कपी बुझ्नेलगायत काममा भने विशेष सतर्कता अपनाइने मापदण्डमा उल्लेख गरिएको छ ।
वि.सं.२०७७ असोज २३ शुक्रवार १३:०९ मा प्रकाशित