१ कात्तिक, काठमाडौँ । स्वस्थ खसीबोका चिनेर मात्रै खरिद गर्न काठमाडौँ महानगरपालिकाले उपभोक्ताहरुलाई आग्रह गरेको छ।
महानगरपालिकाका पशुसेवा महाशाखा प्रमुख डा अवधेश झाले बजारमा आनुगमन गरी स्वस्थ र अस्वस्थ खसीबोका छुट्याइएकोले चिनेर मात्रै खरिद गर्न आग्रह गरेका हुन्।
डा झाका अनुसार स्वस्थ पशुको सिङमा हरियो रङ र अस्वस्थमा रातो रङ लगाइएको बताए । उनले उपभोक्तालाई हरियो रङ लगाइएको खसीबोका र च्याङ्ग्रा मात्रै खरिद गर्न आग्रह गरे।
महानगरपालिकाले उपत्यकाका मुख्य खसीबोका बजारमा नियमित अनुगमन गरी स्वस्थ र अस्वस्थ खसीबोका र च्याङ्ग्राको पहिचान गर्दै हरियो र रातो रङ लगाई छुट्याएको छ ।
पशुको तापक्रम नाप्ने, नाकबाट सिगान बगेनबगेको, पखला लागे नलागेको, झोक्राएर बसे नबसेको हेरेर स्वस्थ र अस्वस्थ पशु छुट्याउने गरेको छ।
यसरी हेर्दा स्वस्थ देखिए विक्रीका लागि स्वीकृति दिइएको डा झाले बताए । चेकजाँचको क्रममा अस्वस्थ भएको पाइए छुट्टै आइसोलेसनमा राखेर उपचार गर्न लगाइएको पनि उनले बताए।
दसैँको बेला काठमाडौँका खसीबोका बजारमा देशका विभिन्न स्थान तथा भारत देखि समेत खसीबोका र च्याङ्ग्रा ल्याई बिक्री वितरण शुरु भइसकेको छ।
यस्तो अवस्थामा अस्वस्थ पशुको बिक्री वितरण हुन सक्ने भन्दै महानगरपालिकाले अनुगमन गरी स्वस्थ र अस्वस्थ पशु छुट्याई स्वस्थ पशुको सिङमा हरियो रङ र अस्वस्थको सिङमा रातो रङ लगाएको हो।
वि.सं.२०७७ कात्तिक १ शनिवार १३:१६ मा प्रकाशित