काठमाडौं । सत्तारुढ नेपाल कम्यूनिष्ट पार्टी (नेकपा)को केन्द्रीय समिति बैठक स्थगित भएको छ । बैठक आगामी मंसिर १५ सम्मका लागि स्थगित गरिएको नेकपाले जनाएको छ ।
कोरोना भाइरस (कोभिड–१९)को जोखिम बढेको कारण बैठक सारिएको नेकपाको केन्द्रीय कार्यालयद्वारा जारी विज्ञप्तीमा जनाइएको छ । बैठक मंसिर १५ देखि १७ सम्म आयोजना हुने विज्ञप्तीमा उल्लेख छ ।
गत भदौ २६ मा सम्पन्न नेकपाको स्थायी समिति बैठकले कात्तिक १५ देखि १७ गतेसम्म केन्द्रीय समिति बैठक बसाल्ने निर्णय गरेको थियो ।
बैठक स्थगितको कारण आन्तरिक कलह
सत्तारुढ नेकपाभित्र विवाद चुलिँदै जाँदा केन्द्रिय समितिका एक तिहाई सदस्यले गत भदौ दोस्रो साता केन्द्रीय समिति बैठकको माग गर्दै केन्द्रीय कार्यालय धुम्बाराहीमा हस्ताक्षर बुझाएका थिए । आन्तरिक कलह व्यवस्थापनका लागि उनीहरुले केन्द्रीय समिति बैठक बोलाइनुपर्ने माग राखेका थिए ।
जसका निमित्त स्थायी समितिले कात्तिक १५ देखि १७ गतेसम्म बैठक बस्ने निर्णय गरेको थियो । तर, पछिल्लो समय आन्तरिक विवाद झनै चुलिन थालेको छ ।
विभिन्न नियुक्ती तथा कर्णाली विवादले नेकपाभित्र विवाद चर्कदौं छ । बैठक स्थगित गरिनुलाई आन्तरिक विवादको कारण मानिएको छ ।
वि.सं.२०७७ कात्तिक १२ बुधवार १४:१० मा प्रकाशित