१.
दीन दुःखी असाह्यको सेवाले पुण्य दिलाउँछ
घायल मुटुले च्यात्तिएकै मनमुटु, तन सिलाउँछ
ढिलोचाँडो भन्नू मात्र न हो मृत्यु आउँछ अबस्य,
हजुर हाम्रो भौतिक शरीर माटोमा बिलाउँछ ।
२.
चाहेको सबै कुरा पाइदैन जिन्दगीमा
बिनासिति कसम खाइदैन जिन्दगीमा
दुई ज्यान एक रथको दुई पाङ्गा नै हो,
माया प्रीति तोड्न लाइदैन जिन्दगीमा ।
३.
वर पिपलुको सितल छायाँ कति राम्रो हजुर
नेपाली नेपाली बिचको माया कति राम्रो हजुर
हिमाल पहाड तराइ आहा मेरो देशको सौन्दर्य,
जन्मभूमि, सेरिफेरो दायाँबायाँ कति राम्रो हजुर ।
४.
जो जो छन् कष्टमा सबको दुःख कष्ट हरुन्
प्रार्थना म गर्दछु ईश्वरले सबैमा खुशी भरुन्
हरेक बिहान यहि चिन्तन मनन गर्दछु म त,
सुप्रभात साथ ईश्वरले जन-कल्याण गरुन् ।
५.
दुईटुक्रा हुदा जोड्ने धागो र सियो बन्नुहोस्
चेतनाको छर्दै बिज अध्यारोको दियो बन्नुहोस्
लथालिङ्ग भताभुङ्ग हुनै लाग्यो हाम्रो यो देश,
लौन कोहि आउनुहोस् दरिलो मियो बन्नुहोस् ।
वि.सं.२०७७ कात्तिक २९ शनिवार ०८:३६ मा प्रकाशित