१३ पुस, काठमाडौं । नेपाली कांग्रेसका सहमहामन्त्री डा. प्रकाशरण महतले यदि सर्वोच्च अदालतले संसद् विघटनको मुद्दामा फैसला नगरी यथावत राखेमा नेपाली कांग्रेसको सम्पूर्ण ध्यान चुनावमा केन्द्रीत हुने बताएका छन् ।
नेपाली कांग्रेसद्धारा प्रधानमन्त्रीद्धारा गरिएको संसद विघटनको विरुद्धमा सोमबार आयोजित विरोध सभामा काठमाडौंको क्षेत्र नं ५ को सभालाई सम्बोधन गर्दै नेता महतले चुनावलाई लम्व्याएर चुनाव विना नै सत्तामा बसिराख्ने दुस्साहस कसैले गरेमा कुनैपनि हालतमा कांग्रेसले नछोड्ने बताए ।
‘गाउँ गाउँ टोल टोलबाट जनता उत्रने छन्, निर्वाचन गर्न हामी बाध्य पार्नेछौं । निर्वाचनको बाटोमा देश गयो भने नेपाली कांग्रेसको जित निश्तिछ ।’ नेता महतले भने ।
उनले नेपाली कांग्रेसले पनि सबै राम्रो गरेको नभएर केही कमि कमजोरी भएको तर यस्तो खाले दुस्साहस, मनपरी र भ्रष्टाचार कांग्रेसको कल्पना भन्दा बाहिरको कुरा रहेको तथा कसैले व्यक्तिगत कमजोरी गरेको भएपनि उ सजायको भागी भएको बताए । ‘अहिले त मनपरी, रातलाई नै दिउसो पार्ने गरेर र रातलाई दिउँसो बनाउने गरेर यीनिहरुले मनपरि तन्त्र चलाएका छन् ।’
वि.सं.२०७७ पुस १३ सोमवार १५:२७ मा प्रकाशित