Sansar News- Online for Global Nepali

कविता: पाखे हूँ गाउँको

छवि वैरागी घिमिरे,मोरङ
१ हप्ता पहिले

को देख्छन् घर गाउँ जीर्ण झुपडी छानो चुहेको यहाँ ?
मुर्दा छोप्न समेत हुन्न कपडा निर्धो कुहेको यहाँ ।
चर्चा मात्र बटुल्न खोज्छ जसले होला र त्यो लेखक ?
कुर्सीमात्र समाउने नियतका को बन्दछन् सेवक ?

हावा दैनिक बाँड्छ बासन यहाँ रोक्दैन ऊ व्यस्त छ
पानी दैनिक प्यास मेट्छ तनको कर्तव्य ऊ बुझ्दछ ।
सल्लो साल बनिन्छ स्रोत बिजुली बल्छ्न् दियालो टुकी
फुल्छ्न् चाँप सुनाखरी रहरले बेली चमेली बुकी ।।

गर्मी मौसममा चिसो सिरसिरे हावा सिरेटो चली
ताजा खानु छ काँकरी कति मिठो त्यस्तै करेलो फली ।
आजै टप्प चुँडेर खान्छु निगुरो पाखा र खोल्सा पसि
कोदो फापरको ढिँडो रहरले ओडाल्छु भान्सा बसी ।।

बारीका डिलमा फलाउँछु सुठो फर्सी कुभिन्डो कति
खोर्सानी मसला पिरो अकबरे लौका चिचिन्डो कति ।
खल्पी खान्छु अचार चट्ट चटनी सिन्की मुलाको म ता
भैँसीको घिउ खान्छु ओलन दही ठेकी मदानी सदा ।।

रायो साग र काउली कति मिठो लट्टे लुँडे खान्छु म
आफ्नैमा छ सिमी पिँडालु कुरिलो यो नै खुसी ठान्छु म ।
खाजा इस्कुस आलु या तरुल ती फल्छन् करेसा भरी
आम्दानी पनि गर्छु बेच्छु सहजै आतिन्न खाँचो परि ।।

बोडी पालक सागपात धनियाँ बेसार फुल्छन् यहीँ
तोरी तेल चना मुगी र मुसुरो भण्डार हुन्छन् यहीँ ।
लौकाका गुचुमुच्च झाङ लहरा फल्छ्न् घिरौँलाहरू
भिण्डी गोलभिँडा मिसाउन गए चाहिन्न केही अरू ।।

यस्तो स्वच्छ सफा छ जीवन यहाँ यो शान्ति पाइन्छ र ?
बस्छौँ दुःख गरेर गाउँ घरमा पाखे बनिन्छौँ तर ।
पैसा दम्भ घमन्ड त्यो शहरमा मात्रै छ आडम्बर
झुप्रो होस् तर गाउँको महल हो पुर्खा बसेको घर ।।

छन्दः शार्दूलविक्रीडित

सर्बाधिक पढिएको

यी हुन् नेपाली सेनाको विभिन्न पदमा लोकसेवा परीक्षामा उत्तीर्ण हुने उम्मेदवारहरु

यी हुन् नेपाली सेनाको विभिन्न पदमा लोकसेवा परीक्षामा उत्तीर्ण हुने उम्मेदवारहरु २ दिन पहिले | संसार न्यूज़

  २ माघ, काठमाडौं । नेपाली सेनाको भर्ना छानौट निर्देशनालय…

१६ कम्पनी आइपिओ निष्कासनको पाइपलाइनमा,इन्फ्रास्ट्रक्चर बैंकको आइपिओ माघ २ गतेदेखि

१६ कम्पनी आइपिओ निष्कासनको पाइपलाइनमा,इन्फ्रास्ट्रक्चर बैंकको आइपिओ माघ २ गतेदेखि ४ दिन पहिले | अजय खत्री

२९ पुष, काठमडौं । सेयर बजारमा पछिल्लो समय सर्वसाधारणको आकर्षण…

यस्तो छ सैन्य मेडिकल, खेलाडी र ड्राइभर पदको प्रयोगात्मक परीक्षामा उर्तीण  हुनेहरुको नामावली

यस्तो छ सैन्य मेडिकल, खेलाडी र ड्राइभर पदको प्रयोगात्मक परीक्षामा उर्तीण हुनेहरुको नामावली २ हप्ता पहिले | संसार न्यूज़

१९ पुस, काठमाडौं । नेपाली सेनाको भर्ना छनौट निर्देशनालय कार्यरथी…

प्रहरीले जारी गर्यो कार्यालय सहयोगी पदमा आवेदन दिएकाहरुका लागि यस्तो सूचना

प्रहरीले जारी गर्यो कार्यालय सहयोगी पदमा आवेदन दिएकाहरुका लागि यस्तो सूचना ३ हप्ता पहिले | संसार न्यूज़

१४ पुस, काठमाडौं । नेपाल प्रहरीले कार्यालय सहयोगी पदमा उम्मेदवार…