अमेरिकाका नवनिर्वाचित राष्ट्रपतिलाई ह्वाइट हाउसमा स्वागत गर्ने चलनलाई वेवास्ता गर्दै बुधबार बिहानै ह्वाइट हाउसबाट बाहिरीएका निर्वतमान राष्ट्रपति डोनाल्ड ट्रम्पले ह्वाइटहाउसमै राष्ट्रपति जो बाइडेनका लागि पत्र लेखेर छोडेका छन् ।
बुधबार राष्ट्रपति भवन ह्वाइटहाउसमा बाइडेनको सपथ ग्रहण र स्वागतका लागि समेत नरोकिएका ट्रम्पले उनका लागि सुन्दर भावको पत्र लेखेर छोडेको बताइएको छ ।
बुधबार दिउँसो क्यापिटल हिलमा राष्ट्रपतिको सपथ ग्रहण गरे लगत्तै ह्वाइट हाउस पुगेका राष्ट्रपति जो बाइडेनले उक्त पत्र फेला पारेका हुन् ।
राष्ट्रपतिको सपथ ग्रहण गरेको केही घण्टामै १५ कार्यकारी आदेशमा हस्ताक्षर गरेका राष्ट्रपति बाइडेनले ट्रम्पको सम्मान गर्दै उक्त पत्रमा लेखिएको कुरा तत्काल सार्वजनिक नगर्ने बताएका थिए ।
‘ राष्ट्रपतिले अत्यन्तै सुन्दर अनि उदार भावको पत्र लेख्नु भएको छ,’ राष्ट्रपति बाइडेनले पत्रकारहरुसँग भने,‘ तर यो निजी कुरा हो । यसको बारेमा म उनीसँग कुरा गरेर मात्र सार्वजनिक गर्नेछु ।’
ट्रम्पका एक वरिष्ठ सहयोगीले उक्त चिठ्ठीका बारेमा बताउँदै पत्रमा देशको सफलता र देशको रक्षाको लागि नयाँ प्रशासनको लागि कामना गरिएको सिएनएनले जनाएको छ ।
निर्वतमान राष्ट्रपतिका लागि यो आधुनिक परंपरा रहेको र उनीहरुले आफ्नो उत्तराधिकारीका लागि चिठ्ठी लेखेर छोड्ने चलन रहेको छ । तर, ट्रम्पले आफ्ना धेरै सहयोगीलाई बाइडेनलाई छोडेको चिठ्ठी नदेखाएको बताइएको छ ।
वि.सं.२०७७ माघ ८ बिहीवार १३:५१ मा प्रकाशित