कहिले संसार आफ्नै हातोमा घुम्छ फनफनी
कहिले जाँतोले घुमाउँछ सिङ्गो संसार पनि
घुम्ने र घुमाउनेको पालो फेरिएको मात्र न हो
सेरामिक्स चक्रमा अल्झिएका छन् रहरहरू
समय त एकनास घुमिरहेकै छ–फनफनी !
गोरेटाहरू गुजुल्टिएका छन् फनफनी
जसरी औलामा शंख र चक्रको घेराभित्र
भाग्यका रेखाहरू गुजुल्टिएका छन् फनफनी
हामी बस्ने धरा जसरी घुमेको छ फनफनी
उसैगरी घुमिरहेझैँ लाग्छ हाम्रो गन्तव्य पनि ।
आकाशमा जून घुमिरहेको छ फनफनी
र, उसैगरी घुमिरहेझैँ लाग्छ घाम पनि
जसरी सागर तातेर बाफ बनेको पानी
मनसुन बनेर आकाशमा घुम्छ फनफनी
जसरी पानी बादल र बादल पानी बनेर
जलचक्र धर्ती र आकाश घुम्छ फनफनी
उसैगरी फनफनी घुमिरहन्छ जीवन पनि ।
आँखामा दृश्यहरू घुमिरहन्छन् फनफनी
विचारब्रह्माण्ड पनि घुमेझैँ लाग्छ फनफनी
जसरी बिपना सपना र सपना बिपना बनेर
दिनरात मन र मस्तिष्कमा घुमिरहन्छ फनफनी
र, उसैगरी दृष्टि पनि घुमिरहन्छ फनफनी
जसरी फनफनी घुमिरहन्छ जीवनचक्र पनि
उसैगरी घुमिरहेझैँ लाग्छ जीवन फनफनी ।
वि.सं.२०७७ फागुन २२ शनिवार ०८:४१ मा प्रकाशित
