२० चैत, काठमाडौं । नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले नेपाली जनताको उपलब्धिलाई उल्ट्याएर देशलाई निरंकुशतातिर धकेल्ने षडयन्त्र भइरहेको बताएका छन् ।
शुक्रबार प्राध्यापक माणिकलाल श्रेष्ठको श्रद्धान्जलिसभा कार्यक्रममा बोल्दै अध्यक्ष प्रचण्डले नेपाली जनताको पहिचान र अधिकारको लडाईलाई उल्ट्याउने र फेरि प्रतिगमनतिर लैजाने षडयन्त्र भएको बताएका हुन् ।
राज्य आफैले समाजलाई पछाडि धकेल्न खोजेको र प्रतिगमनतिर लैजान खोजेको आरोप लगाउँदै अध्यक्ष प्रचण्डले जनताले झण्डै सातदशक भन्दा बढी समयदेखि लडेर ल्याएको उपलब्धिहरु उल्ट्याउन खोजिएको पनि बताए ।
‘अहिले संघीय लोकतान्त्रिक गणतन्त्रमाथि निर्मम प्रहार गर्ने षडयन्त्र भइरहेको छ । लोकतन्त्रका मूल्य मान्यता या आन्दोलनका उपलब्धिले स्थापीत गरेका मुद्दाहरु तथा सहीदहरुले वगाएको रगत मूल्यको अपमान गरेर फेरि समाजलाई फेरि चरम फासिबादी निरंकुतातिर लैजाने खतरा छ ।
अध्यक्ष प्रचण्डले यस्तो षडयन्त्रकाविरुद्ध एक भएर अगाडि बढ्न समेत सबैलाई आव्हान गरेका छन् । उनले जरुरी पर्यो भने आन्दोलनमा फेरि एकपटक त्यो तागत प्रदर्शन गर्नका लागि संकल्प गर्नुपर्ने बताएका छन् ।
अध्यक्ष प्रचण्डले प्राध्यापक माणिकलाल श्रेष्ठको जीवन भौतिक बैभव भन्दा आत्मिक चेतनाद्धारा समाजलाई सु–सस्कृति, सभ्य र अनुशासित बनाउने उद्धेश्यद्धारा प्रेरित रहेको पनि बताएका थिए ।
वि.सं.२०७७ चैत २० शुक्रवार १५:५९ मा प्रकाशित