बर्षात पछि उदाएको बिहान बेग्लै हुन्छ ।
आँखा रसाएको बेला मुस्कान बेग्लै हुन्छ ।
शहर भरी खोज्दा पनि भेटिएन मान्छे,
सायद यहाँ मान्छे चिन्ने पहिचान बेग्लै हुन्छ ।
हुरी बतास बर्षा झेल्दै पालो कुर्नु पर्दा ,
समयले हिर्काएको निशान बेग्लै हुन्छ ।
इच्छाहरू बटुलेर किन जतन गर्नु,
बेमौसमी कल्पनाको उडान बेग्लै हुन्छ ।
गरिबले पो पुरिएर मर्नु बाध्यता हो,
ठुलाबडा धनीको त चिहान बेग्लै हुन्छ ।
वि.सं.२०७८ वैशाख १८ शनिवार ०६:३८ मा प्रकाशित