वैशाख ३०, काठमाडौं । नेकपा (एमाले)ले वरिष्ठ नेता माधवकुमार नेपालसहित उनी पक्षीय नेताहरुमाथि गरिएको कारबाही फिर्ता लिएको छ । बिहिबार प्रधानमन्त्री निवास बालुवाटारमा बसेको स्थायी समिति बैठकले कारबाही फुकुवा गर्ने निर्णय लिएको प्रवक्ता प्रदीप ज्ञवालीले जानकारी दिए ।
नेता नेपालसहित उनी पक्षीय नेताहरु भीम रावल, घनश्याम भुसाल र सुरेन्द्र पाण्डेलाई ६ महिनाको लागि पार्टीबाट निलम्बन गरिएको थियो ।
सर्वोच्च अदालतले नेकपा (एमाले)लाई साबिक अवस्थामा फर्काए लगत्तै फागुन २८ मा आफुँ पक्षीय केन्द्रीय कमिटीको बैठक राख्दै प्रधानमन्त्री केपी शर्मा ओलीले विधान संशोधन, केन्द्रीय समिति विस्तार र माधव नेपालसहित उनी पक्षीय पदाधिकारीहरुको जिम्मेवारी खोस्ने काम गरेका थिए । त्यसयता ओलीले एक पक्षीय बैठक बोलाउँदै एकपक्षीय रुपमा निर्णयहरु गर्दै आएका छन् ।
ओलीको एकपक्षीय निर्णयका विरुद्व राष्ट्रिय कार्यकर्ता भेलामार्फत छलफल अगाडि बढाएको माधव पक्षलाई चैत ७ को बैठकमार्फत ओलीले स्पष्टीकरणसहितका कारबाही अगाडि बढाएका थिए । उनले स्पष्टीकरणपश्चात निलम्बन गरेका हुन् ।
माधव पक्षले भने सुरुदेखि नै सर्वोच्चको आदेशअनुसार एमाले २०७५ जेठ २ को अवस्थामा फर्कनुपर्ने माग गर्दै आएको छ । माधव पक्षले फागुन २८ र त्यसपछि ओली पक्षले गरेका सबै बैठक र त्यसका निर्णय फिर्ता हुनुपर्ने माग गर्दै आएको छ ।
वैकल्पिक सरकार निर्माणबारे दलहरुबीच छलफल चलिरहेको बेला ओलीले गरेको कारबाही फुकुवालाई अर्थपूर्णँ रुपमा हेरिएको छ ।
वि.सं.२०७८ वैशाख ३० बिहीवार ११:५४ मा प्रकाशित