२८ जेठ, धनुषा । धनुषामा पौडी हेल्ने क्रममा पोखरीमा डुबेर पाँच बालिकाको मृत्यु भएको छ ।
धनुषाको मुखिया पट्टी मुसहरनिया गाउँपालिका -६ लक्ष्मपुरका ती बालिकाहरु गाईवस्तु चराउन जाने क्रममा पानी भरिएको गहिरो पोखरीमा पौडी खेल्ने क्रममा डुबेर मृत्यु भएको जिल्ला प्रहरी कार्यालय धनुषाले जनाएको छ ।
गाईवस्तु लिएर गएका उनीहरु दिउँसो साढे १२ बजेतिर पोखरीमा डुबेका थिए । उनीहरुसँगै गएका अन्य दुई बालिका त्यहाँबाट घर फर्किएर घटनाका बारेमा बताएपछि परिवार प्रहरीको टोली घटनास्थलमा पुगेको थियो ।
प्रहरीका अनुसार मृत्यु हुनेमा स्थानीय पल्टु यादवकी १२ वर्षीया छोरी लक्ष्मीनिया, योगेन्द्र भगतकी १० वर्षीया छोरी चन्द्राकुमारी, राजगिर पुर्वेकी १३ वर्षीया छोरी मन्जु, जगरनाथ ठाकुरकी १२ वर्षीया नातनी चाँदनी र उत्तिम साहकी १२ वर्षीया छोरी ललिता रहेको छन् ।
उनीहरु पौडी खेल्ने क्रममा वा अन्य कुनै कारणले घटना घट्यो भन्नेमा आफूहरु अनुसन्धानमै रहेको जिल्ला प्रहरी कार्यालय धनुषाका डिएसपी मकेन्द्र कुमार मिश्रले संसारन्युजलाई जानकारी दिए ।
वि.सं.२०७८ जेठ २८ शुक्रवार १४:५४ मा प्रकाशित