Sansar News- Online for Global Nepali

कविताः सम्झना साउने सङ्क्रान्तिको

कल्पना अधिकारी भट्टराई,सामाखुसी काठमाडौं
२ हप्ता पहिले
कविताः सम्झना साउने सङ्क्रान्तिको

बिहानै सबेरै बढारी कुँडारी
पिई दूध मीठो गरिन्थ्यो तयारी ।
हिँडिन्थ्यो रमाई मिली मित्रसाथ
मिठा बात गर्दै समाएर हात ।१।

न चिन्ता कसैको न सुर्ता छ साथी
डुबी कल्पनामा पुगेँ आज राती ।
टिपी सुन्तला कागती नासपाती
मिलाएर जोडी जुटे भिन्न जाति ।।२।।

कुुकुर्डाइनोको लता खोज्न झाडी
चहार्दै हिँडिन्थ्यो सबै झार फाँडी ।
फिजारेर नाङ्ला भरी चीज नाना
तयारी बनाई पकाएर खाना ।।३।।

लुतो फाल्नलाई जलाएर सिम्ठा
दुबै हात जोडी गरी देव निम्ता।
जलाई सलेदो थपी तेल हाली
बजाएर गाना लगाएर ताली।।४।।

लुतो घाउ लैजा पिलो रोग लैजा
बडारेर जम्मै महाकाल हैजा ।
भनिन्थ्यो सुनिन्थ्यो थियो मेल राम्रो
सुसंस्कार गुम्दै गएको छ हाम्रो ।।५।।

मकैले भरिन्थे मझेरी भरी नै
यता हेर्छु गम्मै उता देख्छु डम्मै।
झिकी संगिनीले मकर्काँचि पात
दुबै मख्ख हुन्थ्यौं बने चारु हात ।।६।।

सिलौटो पखाली दुई बिष्टि हाली
र त्यूरी मिसाएर मात्रा मिलाई ।
लगाई सुतिन्थ्यो दुबै हात माथि
हुँदा हात राता खुशी जान साथी ।।७।।

रमेको छ धर्ती पलाएर मूल
छरेको छ आभा फुलाएर फूल ।
लगातार बर्षा झरी व्योमबाट
बने उग्रचण्डी जसै मेघनाद ।।८।।

ससाना कुलेसा थिए उर्लिएका
अहंकारले झन् छुँदा कुर्लिएका ।
सबै खेतबारी बनाई जलाम्मे
घुलो साम्यपारी भएका हिलाम्मे ।।९।।

थिए स्याखु, छत्री कला ती पुराना
मिले आज छाता बने ती बिराना ।
भयो थालनी ती गुनी चाडबाड
खुलेका मिलेका तराई पहाड ।।१०।।

कठै सम्झनाले उतै लान्छ तानी
कहाँ मिल्छ खै त्यो खुशी जिन्दगानी ।
गयो जिन्दगी यो नपाएर भेउ
उतै जान्छु आमा तिमी साथ देऊ ।।११ ।।

छन्दः भुजंगप्रयात

 

 

 

सर्बाधिक पढिएको

ओलीतन्त्रको समिक्षा र देउवाको चुनौती

ओलीतन्त्रको समिक्षा र देउवाको चुनौती ३ हप्ता पहिले | नीलकण्ठ तिवारी

सबै कुरालाई हाँसीमजाकमा लिने निवर्तमान प्रधानमन्त्री केपी शर्मा ओली बडो…

ओली बिनाको पार्टी एकताको तयारी गर्दै प्रचण्ड र माधव, को–को हुँदैछन् सहभागी ?

ओली बिनाको पार्टी एकताको तयारी गर्दै प्रचण्ड र माधव, को–को हुँदैछन् सहभागी ? ३ हप्ता पहिले | संसार न्यूज़

असार ३०, काठमाडौं । राजनीतिक घटनाक्रम फेरिएसँगै एक ठाउँमा उभिएका…

माधव पक्षीय कार्यदलमै विवाद : गोकर्ण र सुरेन्द्र एकातिर, घनश्याम अर्कोतिर

माधव पक्षीय कार्यदलमै विवाद : गोकर्ण र सुरेन्द्र एकातिर, घनश्याम अर्कोतिर ३ हप्ता पहिले | समर शर्मा

असार २४, काठमाडौं । एमाले विवाद समाधान उन्मुख भएको चर्चा…

नेपालीहरु ठगिएको गुनासो बढ्न थालेपछि कतारस्थित नेपाली दूतावासले जारी गर्यो यस्तो सूचना

नेपालीहरु ठगिएको गुनासो बढ्न थालेपछि कतारस्थित नेपाली दूतावासले जारी गर्यो यस्तो सूचना ४ हप्ता पहिले | संसार न्यूज़

१८ असार, कतार । कतारस्थित नेपाली दूतावासले डिजिटल ठगीबाट बच्न…