१६ साउन, काठमाडौँ । कोरोना विरुद्धको खोप आयात गर्न सरकारले निजी क्षेत्रलाई पनि अनुमति दिएको छ ।
शुक्रबार स्वास्थ्य तथा जनसङ्ख्या मन्त्रालयले विज्ञप्ति जारी गर्दै खोप आयात गर्न इच्छुक निजी क्षेत्रलाई पनि खोप खरिद गर्न दिइएको जनाएको हाे ।
प्रवक्ता डा कृष्णप्रसाद पौडेलद्वारा शुक्रबार जारी उक्त विज्ञप्तिमा मन्त्रालयले खोप आयात गर्न इच्छुक निजी क्षेत्रलाई पनि विश्व स्वास्थ्य सङ्गठन र नेपालको नियामक निकाय औषधि व्यवस्था विभागबाट आकस्मिक प्रयोग अनुमति प्राप्त कुनै पनि खोपको उत्पादन मूल्य र आयात खर्चमा अधिकतम १० प्रतिशत मुनाफा लिएर खरिद गर्न दिइएको उल्लेख छ।
सरकारले कोरोना भाइरस सङ्क्रमणविरुद्धको खोप आगामी असोजमसान्तसम्म एक करोड ८३ लाख ८२ हजार ८५० मात्रा ल्याउने भएको छ । त्यसका लागि कूल जनसङ्ख्याको ७२ प्रतिशत अर्थात पहिलो प्राथमिकतामा रहेका दुई करोड १५ लाख र पछिल्लो समय १२ वर्षदेखि १८ वर्ष उमेर समूहका ४९ लाख गरी कूल दुई करोड ६५ लाखमा खोप लगाउने लक्ष्य लिएको छ । ती सबैलाई खोप लगाउनका लागि कूल पाँच करोड ३५ लाख मात्रा खोप आवश्यक हुनेछ ।
वि.सं.२०७८ साउन १६ शनिवार ०८:०४ मा प्रकाशित
