अमेरिकाको वाशिड्गटन डिसी मेट्रो क्षेत्रमा वसोवास गर्दै आएका नेपाली कराते खेलाडी उज्ज्वल ठकुरीले वल्र्ड च्याम्पियनशिप बेल्ट (पेटी) प्राप्त गरेका छन् ।
नर्थ क्यारोलिनामा मे १३ तारिख २०१७ मा आयोजित कुरो बुशि वल्र्ड मार्शल आर्ट प्रतियोगितामा वल्र्ड च्याम्पियनशिप बेल्ट (पेटी) प्रदान गरिएको हो । ठकुरीले उक्त प्रतियोगितामा बिशेष प्रस्तुति गर्दा उनलाई आयोजकले बिशेष सम्मान गर्दै बिश्व प्रतियोगिताको पेटी प्रदान गरेका हुन् ।
उक्त अन्तर्राष्ट्रिय किक बक्सिङ्ग तथा वल्र्ड मार्शल आर्ट च्याम्पियनशिपमा उनले पहिलो प्रस्तुतिमा ४० पाउण्ड तौल दातले उठाएर शरीरमा ४० पाउण्ड तौल बाधेर हातमा काँचो अण्डा बोकेर २ खुट्टा पुरै फांग गरी अण्डा नफुटाइ ३ वटा काठको बोर्ड फुटाएका थिए ।
दोस्रो प्रस्तूतिमा ४० पाउण्ड दातले उचालेर हातमा काँचो अण्डा बोकेर १० वटा काठको बोर्ड २ खुट्टा पुरै फांग गरी फुटाएका थिए । तेश्रो प्रस्तुतिमा उनले दात र शरीरमा गरी १ सय ४० पाउन्ड तौल उचालेका थिए भने चौथो प्रस्तूतिमा उनले २ खुट्टा पुरै फांग गरी आफ्नो दातले १ सय पाउण्ड उचालेर दर्शकलाई चकित पारेका छन् ।
ठकुरीले आफ्ना सवै प्रस्तुति गरेपछी कुरो बुशि मार्शल आर्ट संगठनका संस्थापक अध्यक्ष ग्रान्ड मास्टर एर्नेस्ट दुकेशले ठकुरीलाई वल्र्ड च्याम्पियनशिप पेटी तथा सम्मान पत्र प्रदान गरेका थिए ।
वि.सं.२०७४ जेठ ७ आइतवार ०३:२८ मा प्रकाशित
